2013-11-29

Abenduak 3

Euskararen Nazioarteko Eguna - Euskara Mundiala!

Euskararen Nazioarteko Eguna dela-eta, Eusko Jaurlaritzako Hizkuntza Politikarako sailburuorde Patxi Baztarrikak egun horretarako prestaturiko kanpaina aurkeztu zuen hilaren 22an.
EiTBrekin lankidetzan burutuko den kanpaina, euskara mundiala dela erakustera dator aurten, eta etorkizunerako erronka erabileran dagoela azpimarratu nahi du. Sare sozialak erabiltzeko gonbidapena eginez, euskara mundiala dela ez ezik, munduan dagoela ere azalduko du kanpainak.

Mundiala da aurtengo leloa                         Iturria: Euskadi.net

Euskara hizkuntza modernoa, erabilgarria, bizia, gaztea, noranahikoa, geurea… baina batez ere mundiala dela erakutsiko du aurten abenduaren 3rako prestatu den kanpainak. Mundiala, geure hizkuntza delako batetik; eta bestetik, mundu zabalean dituen milioi bat hiztunei hitza eman nahi dielako (800.000 inguru Euskal Herrian, 200.000 munduan) Hiztun horiengan erabileraren aldeko sentsibilizazio lana ere egin nahi du kanpainak, hizkuntzaren erabileran baitu euskarak etorkizuneko erronka nagusia.
Euskara esparru ez ofizialetan ere erabiltzeko modukoa dela agerian utzi nahi du #mundiala kanpainak (sare sozialetan edo lagun arteko giroan, kasu), eta gaur egungo komunikazio tresnetara egokitzeko gai dela ere bai. Sare sozialen loraldia baliatuta, mundu zabaleko euskal hiztunak konektatuko dituen sarea osatuko du. Eta horretarako jaio da beren beregi mundiala.net ataria, herritarrei txioak bidaltzeko gonbidapena egiten dien gunea.
Twitter-en dauden 35 hizkuntzetako bat da euskara. #mundiala kanpainarekin sare sozialetan euskararen erabilera bultzatu nahi da, eta bide batez munduan dabiltzan milioi bat euskal hiztunak, urrunekoak zein bertakoak, nondik nora dabiltzan ikusi, edo elkarrekin nola konekta daitezkeen azaldu.

Mundiala.net

Bidaliozu txio bat munduan zehar dabilen lagunen bati. Horixe da mundiala.net atariak bertara sartzen den erabiltzaileari egingo dion gonbidapena. Munduko edozein bazterretan, edo auzoan bertan bizi den lagunari txio bat euskaraz bidaltzeko gonbidapena da. Bat edo nahi adina. Txioa euskaraz izatea beste baldintzarik ez dago. Bidalitako txioguztiak, eta egin duten bidaia, kanpainaren mundu mapan azalduko dira irudikatuta. Mundu zabalean bizi diren euskaldunen kokalekuak identifikaturik geldituko dira horrela mapan, mezua igorri edo jaso den lekuan argi bat piztuko baita.
Txio bat pertsona bati zuzenean bidali ordez modu irekian bidaltzen bada, norberaren jarraitzaileei iritsiko zaie. Kasu horretan ez da batere argirik piztuko, baina atariak duen kontagailuan zenbatua geldituko da txiohori. Bidalitako mezu kopurua bezalaxe, erabiltzaile kopurua, mezuek egindako kilometroak eta partaide diren herrialdeen kopurua ere erakutsiko du atariak.
EiTBren lankidetzarekin gauzatu da kanpaina, eta abenduaren 3ra arte, talde horretako hedabideetatik kanpainan parte hartzea sustatuko da. Esatari eta aurkezleek txioak bidaltzeko gonbidapena zabalduko dute, eta saioek eurek ere mezuak bidaliko dituzte. Azaroaren 20tik irekita dago mundiala.net ataria, eta dagoeneko hasi da euskarazko mezuen joan-etorria mundu mapan irudikatzen.

iruzkinik ez:

Argitaratu iruzkina