Hizkuntza aniztasuna Europan

Iturria: Euskaltzaindia.

Europako hizkuntzei buruzko mintegia antolatu dute Euskaltzaindia eta Sabino Arana Fundazioak. Bertan azaldu denez 255 hizkuntza baino gehiago mintzatzen dira Europan, eta horietatik 128 egoera larrian daude, eta 90, oso egoera larrian.

Csaba Sándor Tabajdi Europako Parlamentuko Sozialisten eta Progresisten Aliantzaren Taldeko eurodiputatuaren esanetan, egoerari buelta eman dakioke. Euskararen kasua aipatu du, “bizirik irautea ez ezik, aurreratzea ere lortu baita".

Nafarroako egoera ere kontuan hartu du, eta hauxe azpimarratu: "40.000 nafarren hizkuntza-eskubideak Foru Gobernuaren esku daude". Eta frantziar estatuari dagokionez, honako hau adierazi du: “Ez du aitortzen frantsesa ez den beste hizkuntzarik, eta horrela Lapurdi, Nafarroa Behere eta Zuberoako milaka euskaldunen eskubideak urratzen ditu”. Hori dela-eta, europar instituzioei eskatu die “presioa egin diezaiotela frantses gobernuari, Hizkuntza Gutxituen Gutuna berresteko konpromisoa bete dezan”.

Informazio gehiago: Euskaltzaindia

Informazio gehiago: Sabino Arana Fundazioa